Alle die in hohem mv̊te wellen sin·
den wil ich dc râten vf die trúwe min·
dc si minnen gvͤtú wib·
svnder valsch mit trúwen als ir selber lib·
Gvͤtú wib sint gv̊t fúr allerhande leit·
von ir gvͤte hat man mange werdekeit·
in der werlte nieman mag·
an ir helfe vro beliben einen tag·
Zvht vnd ere trúwe milde hoher mv̊t·
kvmt von wiben darzv̊ maniger hande gv̊t·
ir lip engel schone hat·
al der werlde heil an ir genaden stat·
Ich wil iemer hohen mv̊t von wiben han·
fwie ein wib vn wiblich habe an mir getan·
swc ich da von leides dol·
des mag mich ein gůt wib noch ergetzen wol·
Vinde ich die dú dienst kan fúr dienst nemen·
ich tv̊n ir den dienst der ir mv̊s gezemen·
vnd der mich gemachet wert·
selhes wibes han ich ie zefrowen gert·
Si mv̊s tvgende gvͤte bi der schoͤne han·
der min lip mir dienst mer wirt vndertan·
dar zv̊ wiblich sin gemv̊t·
eren rich vor allem wandel gar behv̊t·
Ich wil gerne sin ein frǒwen vrîer man·
al die wîl ich niht ein gv̊te vinden kan·
e dc ich den dienst min·
me verlur ich wolde e ane frǒwen sin·