Interea crudelis hiems aquilonibus alte
obstrepit exagitatque nemus. Radicibus imis
concussae pinus strident et uertice nutant...
Pendula ubique riget glacies et cana senescunt
dorsa iugi, horrescunt ualles et flumina torpent.
Quam rapido effugiunt hominum bona concita lapsu
et iuxta sequitur series alterna malorum!
Totus nempe decor siluarum et commoda uitae
cesserunt decussa gelu. Venatica cessit
praeda placensque labor, subeunt tutissima agrestes
antra ferae nec odora canes lustramina poscunt.
Vellicat aegra fames uentrem sensimque ferina
fercula deficiunt et dura grauescit egestas.
Vescimur alternis, seu parca cibaria in omnes
partimur. Viridi collectas ilice glandes
et frondes sparsumque decet glutire putamen.
Impasto languent effetae in corpore uires
et uix stare licet. Rugosum pallida uultum
deformat macies squalentique horrida barba
ore riget concreta gelu, intersecta dehiscunt
labra manusque secat glacies. Iam frigidus imis
sanguis hebet uenis et ferme contrahit artus.
Nos ergo borealis hiems uesanaque edendi
compellit rabies sacrato excedere cliuo.