Dum lacus celeri volant per aequor
Naves remigio, venustiores
Najades caput efferunt ab undis,
Cursumque adspiciunt choro frequentes.
Dum Pristis liquidas vias vorando
Omnes anteit, et propinqua metae
Jam fertur, manibus caterva plaudit.
Dum remos magis et magis Chimaera
Impellens, proprium labore pondus
Vincit, et lateri priorem adurget,
Plaudunt Naïades. Gyae implicatam
Ut navem scopulis vident acutis,
Illi addunt animos manu atque voce.
Quod si praecipiti ruit Menoetes
Lapsu in aequora, at illico resurgit
Tristis et madidus fluente lympha,
Caelum Naïades replent cachinnis.
Verum ad dira simul venitur arma,
Rubroque inficitur lacus cruore,
Caesa et corpora jam natant in undis ;
Voces terrificas ad astra tollens
Turba Naïadum, cito latebras
In imas fugitant, et inquinatas
Atra caede suas domos queruntur.