Iam nubes caelo nebulaeque et frigidus imber
Diffugiunt; nitide Phoebus ab axe micat.
Jam lenes zephyri Boream pepulere furentem,
Et referunt tutas per vada salsa rates.
Liquentes trepido discurrunt murmure rivi,
Frugifer et cultos irrigat humor agros.
Undique prata virent, redolentque recentibus herbis,
Succrescunt violae, cana ligustra, rosae.
Suave canunt volucres modulanti gutture carmen,
Et ponunt nidos percitae amore suos.
Dulcia naturam pertentant gaudia totam
Namque sacer Veneri blandus aprilis adest.
Sed quibus infando mordetur crimine pectus
Ver nunquam floret, jugis at horret hyems.