O fontes gelidique limpidique,
Laudabunt alii citos aquarum
Jactus exilientium, quibus vos
Per altum aethera luditis; vel amplas
Conchas et simulacra in aere sculpta aut
Saxo, phidiacae manus labores,
Queis vobis decus additur venustum.
Sed me saepe meis ad astra ferre
Vestram carminibus salubritatem
luvat, limpiduli bonique fontes,
Sive quem reperit puella quondam,
Vel queis Lancisius potens medendo,
Vel gryllus, vel apes dedere nomen.
Vobis Blandusiae nitore lymphae,
Sensu frigidulo ac suavitate
Cedunt, et latices sacri poetis
Quibus Thessala erant rigata Tempe.
Sed qui vos celebrem, salubriores
O fontes acidive sulphurisve
Pleni ad Flaminiam viam scatentes,
Velabrum aut ubi Jani adornat arcus;
Aut quas cernit ab Appia viator
Et sanctae merito vocantur undae?
Per vos corporibus repulsa ab aegris
Morborum gravis effugit caterva,
Et salus redit ac vetusta virtus.
Quid mirum ergo quod undique affluentes
Quirites laticum specus frequentent
Vestrorum, hic properans pedes, sed ille
Pulcro vectus equo aut volante curru,
Et certent cyathos bibisse plures?
Quare vos procul hinc valete, abite,
Quotquot innumeris Galeni in urnis
Profert pharmaca venditor togatus.
Pulmones, stomachum, jecur, lienem
Mt satis recreant satisque purgant
Hi fontes gelidique limpidique,
Quorum praesidio, ac Deo favente,
Annos vivere Nestoris studebo.