Posthume, qui barba es tanta videaris ut hircus,
Et fumum e labiis semper ut Aethna vomis,
Ostentas te velle jugo subducere collum,
Et libertatis dulcia signa sequi?
Perbelle! Ergo animi nunc debellare tyrannos
Incipe, qui omne nefas imposuere tibi.
Disjice lasciviem, qua capro es turpior ipso,
Auri et inexpletam disjice corde famem,
Cedat ab insana error et ignorantia mente,
Perpetua et molli a corpore desidies.
Impietas abeat procul, ac te saepius arae
Praebentem videant thura precesque Deo.
Si facias: seu rex unus, seu fraena Senatus
Imperii teneat, Posthume, liber eris.
Ni facias: Titus ipse regat, vel publica sit res,
Semper eris servus diraque faex populi.