Quod multo aërii struuntur arcu
Pontes, quodque viae patent recentes
Passim per Latium, aut vetustiores
Aequant difficile arduumque dorsum,
Gratantur populi sibi Tibique,
Princeps optime, largo adaucta censu
Sic commercia, queis opes parantur,
Vitae et commoda dulciora, et artes.
Mage at pectore gestiunt ab imo,
Quod sic undique ab oppidis et agris
Certatim propero pede affluentes
Omnes Te melius queant adire,
Tuoque intuitu frui paterno,
Princeps optime, qui tot es benignus
Auctor et columen decusque rerum.