Cunctas Hasilina super formosa puellas
Sarmatiae gelidis quas clausit vistula ripis
Et quas undosus variis erroribus hister
Irrigat: Hercynio nec talem Alemania saltu
Nutrit in arctoas extendens brachia terras
Pulchrior Hesperiis Rheni et praelata puellis
Forma colorque viget niveae dum vincula plantae
Exerit aethereas nymphas cum gressibus aequas
Purpureis suffusa genis tua lactea splendet
Exhilarans facies: tua singula membra decore
Extulit. et cunctos natura adverterat artus
Nigra superciliis: frons libera: candida cervix
Sidereique oculi modicoque tumentia labra
Flammea quaeque favos superant et hymettia mella
Quid genus enumerem: teretes dum corporis artus
Semine divino testentur et ora creatam
Inferior non ipsa deae cui munera fulua
Obtulit in phrygiis iuvenis notissimus aruis
Te riguis nuper qualem conspeximus ortis
Dum liquidis soliis tua corpora pulchra lavares
Candida formosae superabas membra dianae
Et charites calcant niveis quae gramina plantis
Nostra feras facili nunc carmina poscimus aure
Diva: tibi tacitas iam depromentia curas
Atque animum aeterno cupidum tibi tempore iungi
Candida suscipias discasque assuescere votis
Iam non dura meis tollam super aethera nomen
Carminibus generosa tuum: nec Sarmata tantum
Cognoscet: varias veniet tua fama per oras
Et sua qua prono demittit vertice Phoebus
Lumina: per Scythicos et qua coit unda rigores
Non ego consueto mortalibus uror amore
Tecum et in internas desaevit flamma medullas
Visceribus congesta meis: ceu turbidus ignis
Dum furit et flabris longe impellentibus Euri
Corripit aestivos stipulis crepitantibus agros
Et vagus aethereum fumus subducit olympum
Haud aliter furibundus amor mea concremat igne
Pectora: nec possum validas exstinguere flammas
Vel sua cum Phoebus infundit lumina terris
Frigida vel gelidus dum versat plaustra Bootes
Dum subit illa mihi facies cum fronte serena
Insidet urbanus blandis cui semper ocellis
Risus: et occultas inspirans gratia flammas
Dum coma cum niveis in toto corpore membris
Albentesque manus et bracchia mollia menti
Inciderint: mens aegra gemit: suspiria longa
Pectore fessa trahens. lingua interruptaque verba
Cogitur aegra loqui: gelidaeque simillima morti
Pallida membra cadunt solitas perdentia vires
Saepius illa tamen vidisti immitior omni
Saetigero: et rabidis quae caspia litora oberrant
Tigribus: aut furiens quae concutit unda natantes
Murmure fluctifrago scopulos symplegados arcte
Sed mihi iam toto spirans sub pectore diva
Redde vices: et dura meae modo tempora vitae
Commuta: et saevas abigas de pectore flammas
Respondens tantis mulier saevissima curis
Ni facias: effundam animam furibundus amore
Vitaque districto fugiet de corpore ferro
Impia funesto tandem inscribere sepulchro
Dum mea cum tali signentur carmine saxa
Hic iacet infausto nuper correptus amore
Celtis: et insoliti causa est Hasilina sepulchri