TISIPHONE
En vocat caedes violenta caedem.
Flagitant manes queruli, inquieti,
Caesus occisor cadat, expietur
Sanguine sanguis.
Nesciens peccas? Male nesciebas.
Negligens patras? Male negligebas.
Innocens non es: lue, qui nocebas
Nescius author.
At cecidisti merito nocentem:
Iudica, damna; facis innocentem
Non ream caedens: merito at nocenti
Caederis ergo.
Hercules fidam Megaram perimit,
Sed furens: absit scelus a furore.
Herculem, an falsa, an furiosa coniux,
Deianira.
Unda sic undam trahit, ignis ignem:
Sic scelus pensat scelus: urget iram
Ira: non iustae comes ultionis
Ultio iusta.
At sinit iustos aliquando caelum
Caedi ab iniustis: fateor: sed illos
Alteri vitae, assiduae Gehennae
Destinat istos.
Sera, sed certa est pede Poena claudo.
Ultor a tergo premit irrepressus.
Neminem fallit Nemesis; nec ulli
Fallitur illa.