Non purulentis oblita sordibus
Edax Vetustas his penetralibus
Late superbit, sed perenni
Mnemosyne solio recumbit.
Vitae rependit praemia traducis,
Asprisque solvit pensa laboribus,
Et quas frequentato dolore
Indigenae meruere palmas.
Pacatus arces jam genitor capit,
Quas, destinato limite, laurea
Pax sepsit, et confasciavit
Turriferos apices oliva.
Hic pessulato vox ululantium
Inhaeret antro, nulla penatium
Lamenta, nec tanto profusi
Hospitio gemitus reclinant.
Cives eburnis aurea barbitis
Lusuque mulcent sidera, pars choris
Indulget aeternis, sonantes
Pars cytharas digitis pererrat.
Ales triumphos sic Palamedia
Gyrat, gelatae quando hiemis rigor
Discedit, et sese ligustris
Prata superbificis colorant.
Aethram stupentem tunc modulatibus
Illectat; illi silva sequacibus
Conis remugit, duplicesque
Unum opus accumulant lepores.
Patri jugatis gressibus additur
Comes serenus filius, Isthmiis
Nusquam triumphator palaestris
Vulnere nobiliore fulsit.
Depurpurati vulnera corporis
Ostentat ardens; hos Othomanicae
Inquit, sarissae permearunt
Funeris impavidos lacertos.
Haec ignearum fulmina glandium
Circum fremebant pectora, saepius
Athleta lunatas phalanges
Elicui metuendus hasta.
Volente donec Numine, tragula
Scrutatur artus Thrax truculentior,
Lassumque tot palmis paratis
Pulvere funereo supinat.
Amore fossas Numinis et Crucis
Nunc pando plagas; quis melioribus
Pugnavit armis, clariores
Aut tulit exuvias reversus?
Non sarcinata pelle Libystidis
Incingor ursae, non Nemeeïo
Leone, quem victor subegit
Amphytrioniades in arvo.
Crux velat armos, sideris aemula
Crux glorioso vertice fulgurat:
Aeterna susceptos labores
Mnemosyne cruce muneratur.