Dixerat. Hinc serpit murmur, tonat inde tumultus:
Scinditur in varia turbida Roma vices.
Ipse caput, dextram, corpus, diademate, sceptro,
Purpureis privat rex, sine rege manens.
5At pater in medio linguam sibi poscit. Inaurat
Castigata fides, vita probata loqui.
Patres, qui bella frenatis in otia, quorum
Cervicosa pedi colla subacta iacent,
Quorum discreta ratio, mens provida, quorum
10 Dens sale conditus, et sine dente sales,
Advigilate viri votis. Non danda requirit;
Qui repetenda petit, impetret, absque tamen.
Me nisi pro merito donent, nisi vota secundent,
Si concessa michi, si data turpe negent,
15Fortes emerita plangent virtute, dabuntque
Qui bello dederant pectora, terga fuge.
Te nisi pro merito servent, nisi vota restringant,
Ni non danda tibi iure neganda negent,
Desperata ruet virtus, tedebit ephebos,
20 Quod veniant meritis premia surda suis.
Vel dampni votum, vel dampna sue probitatis,
Quis sapienter amat? Quis patienter habet?
Munera pro meritis pensentur, nec probitatem
Improbet, aut reprobos approbet, ipse dator.
25Sed peccata cruce, sed fortia laude. Sed isti?
Sed dentur meritis consona cuique suis.