PUER.
Virgo sidereis pulchrior ignibus,
Auro fulgidior, lucidior vitro,
Rubro gratior ostro,
Alba candidior rosa.
VIRGO.
Jesu, purpureo clarior Hespero,
Luna splendidior, sole serenior,
Vernis gratior arvis,
Hiberna nive purior.
PUER.
Sic fulges oculis, ut geminus prope,
Qui cum lusit agris fons Eseboniis,
Clausum stare quieto
Se miratur in otio.
VIRGO.
Sic luces oculis, ut geminae prope
Lucent, seu fluvio, sive liquentibus
Lotae lacte columbae
Assedere canalibus.
PUER.
Ornant ingenuae colla tibi comae,
Lydis lota velut purpura fontibus,
Summis aut Galaadi
Declines capreae jugis.
VIRGO.
Ambit pulchra tuas caesaries genas,
Qualis frondifluis palma viret coniis:
Qualis corvus in ipsis
Plumarum tenebris nitet.
PUER.
Virgo, lene tuis verba fluunt labris,
Hyblaeo veluti mella fluant favo,
Aut demissa solutis
Errent flammea taeniis.
VIRGO.
Jesu, dulce tuis ora natant sonis,
Infuso veluti pocula Caecubo.
Aut humecta caducis
Gemment lilia roribus.
PUER.
Mammae sunt similes hinnuleis tuae,
Qui tondent teneris lilia morsibus,
Dum se fessus anhelo
Inclinet senio dies.
VIRGO.
Certant, Nate, tuis uberibus botri;
Botri, (juos viridis parturiit Cypros,
Aut quos educat almis
Engaddus viridariis.
PUEll.
Quisquis, Virgo, tuas adspiciet genas,
Poenis adspiciet mala rubentia
Ramis: caetera claudunt
Imo se bona pectore.
VIRGO.
Quisquis, Nate, tuis haeserit iu genis,
Pictam dispositis artifici manu
Liliisque rosisque
Emirabitur aream.
PUER.
Qui te non amat, est barbarior feris,
Pardis asperior, tigride saevior,
Impacatior ursis,
Iracundior anguibus.
VIRGO.
Qui te non amat, est marmore durior,
Saxis horridior, surdior aequore,
Inconstantior auris,
Immansuetior ignibus.