(PL 19 0370A)
995Iamque videns fratrem vallatum cum grege turma,
Procurvus prona Dominum cervice salutat.
Congressi multo coniungunt pectora fletu.
Et iam iamque magis vario sermone requirit,
Qui veniant comitante manu, quae turba sequatur. (0370B)
1000Ille docet, nuptae quo sint genitore creatae,
Diversique greges qua sint mercede parati,
Confestimque nurus curvo cum poplite fusae
Admorunt teneros cognata ad basia natos.
At senior prolata pie dum munera vitat,
1005Mitificus mulcet concordis pignora vatis,
Atque libens fratre pariter comitante recurrit,
Ut vice sermonum sensim sua gesta referrent.
Sed quia lentigrado serpebant agmine foetae,
Subsedit vates, gregibus, famulisque regendis,
1010Parvaque frondoso posuit mapalia tecto,
Nomine quae fixo placuit vocitare Tabernas.
Devenit ad Sicimas, quae sunt regione Chananna,
Mercatus pretio confinis praedia terrae,
Atque Deum structis properans altaribus orat.