(PL 19 0362C)
Ipse etiam insuetis postrema in tempora votis
Fit pater, et laeti reputans solatia risus,
Nuncupat Isaacum, mandata et numinis alti
Efficit, octavo decerpens lumine tegmen
655E veretro, stabilesque videns iam promere gressus.
Coniunctus inter propria de stirpe propinquos
Vescitur, et mensis genitor gratatur opimis.
Nam desperatis maior fit gratia votis.
Iamque puer puero iunctus dum ludit alumno,
660Compulit ignito matrem turgescere felle. (0362D)
Et tamen invitus senior dum maxima iussa
Observat Domini, pariter detrusit utrumque.
At mulier postquam domini de sede remota est,
Avia dimoto lustrat secreta regressu. (0363A)
665Iamque panes cunctos, vinumque insumpserat omne,
Exanimem lasso suspirans pectore natum,
Devenit ad puteum, cui tum Miratio nomen
Indiderat, moesto quae inflevit devia quaestu:
Cum Deus afflictae lacrymis trans aethera motus
670Confirmat trepidam, natoque ingentia dicit
Regna parata suo, cuius tum clade gemescat.
Ilicet irriguo scatebras de gurgite libans
Erigitur, natoque simul gaudente laetatur.
Procedunt pia iussa Dei, iam parvulus arcum
675Tendere, et aligeras coepit torquere sagittas.
Interea vates, ne quid clam forte pararet
Ductor Abimelus, connectit foedera pacis. (0363B)
Ut quia de puteis fuerant certamina mota,
Reddita securam firmarent otia vitam.
680Iuratur, placitaeque manent concordia pacis.
Inde senex curvo terram dum [vomere] sulcat,
Ingentem laetis complevit messibus aulam,
Sublimemque Deum supplex per vota precatus,
Philistinorum placidus consedit in arvis.