(PL 19 0362A)
625Interea excedit positis de sedibus Abram,
Et Gererum ad terras socia cum coniuge transit.
Hic Abimelechus cupiens consortia Sarrae,
Principis arbitrio, germanam nam fore vates
Dixerat eximius, fraudem ne forma pararet.
630Coniugis innocuo, rivales dum cavet iras,
Nec tamen valuit, validis terroribus actus,
Qui mentem afficiunt, quoties perversa libido est:
Nam Deus immisso torsit lictore tyrannum,
Prosequitur trepidus vatem vix mente reversa. (0362B)
635Cur Sarra sit dicta soror, ceu nulla marito
Vincla ligent nuptam, cum sit coniuncta prophetae.
Ille docet causas, seseque a crimine purgat,
Mentitus nihilum, fratris nam germine creta
Sarra fuit, iuncta diducens linea sanguem.
640Haec ubi constiterant, rector dat mille talenta,
Et famulos, his molle pecus, armentaque iungit.
Iugera quin etiam latos diffusa per agros,
Dummodo promeritum lenirent dona reatum.
Namque domus regis admissa piacula pendens,
645Qui cum terrifico rupisset somnia visu,
Agmine morborum pariter grassante per omnes,
Germina femineis dudum decusserat alvis. (0362C)
Verum ubi pacificus vates pro rege poposcit
Procubus ante Deum, promptim se laeta per omnes
650Reddidit ubertas, alvosque implevit opimas.