(PL 19 0375C)
1250Interea Iacobus, fleto iam funere nati,
Bis quinos iuvenes numeroso e germine mittit,
Qui longinqua (sibi) pretio frumenta pararent:
At minimum cunctis Beniaminum non sinit ire,
Invalidus durum nequeat ne ferre laborem. (0375D)
1255Atque ubi iam Fariae perventum ad moenia terrae est,
Summissi petiere solum, fratremque salutant,
Mirantes celsa sublimem sede sedentem,
Nec tamen agnoscunt longo post tempore visum.
Quos ubi perspexit, memori cum mente propheta
1260Increpat, et multa proterret voce paventes,
Scitatum venisse ferens, quae copia frugum,
Quive viri pingues teneant moderamine terras. (0376A)
Allegant nescire dolos, seseque fatentur
Bis senos quondam fratres genitore sub uno
1265Conspicuam tenuisse domum, his omnibus unum
Postremum natu patrios servare labores,
Ast alium celebri iam pridem defore letho.
Se diram vitare famem, terramque Chanannam
Exosos, tenui damnantem semina fotu,
1270Poscere venales species, licitataque farra.
Eloquitur vates, rectoris nomine iurans,
Claudendas dura iuvenes custodia, donec
Germanum exhibeant, genitor quem mitis habebat.
Nectuntur trina pariter sub cura tuentum,
1275Laxatique dehinc, unum liquere tenendum. (0376B)
Nec minus occulto rumpentes corda dolore,
Commemorant, quam iusta sibi discrimina surgunt,
Quod fratrem immeritum vetito transcribere pace,
Commissi sero poenas sub iudice pendant.
1280Ingravat haec dictis Rubenus vera renarrans,
Ac scelus immensum, sese nolente, peractum.
Flectitur his vates, germana iurgia noscens,
Luminibus tacitis conversus flebile plangit.
Haec inter media fratrum Simeona corona
1285Accipitur, fidus cunctis redeuntibus obses.
Tum petita sibi iuvenes frumenta capessunt,
Immensoque graves urgentur pondere muli,
Iamque viae medio, dum solvit vincula sacci,
Fratribus inventos quidam dat visere nummos.
1290Id cuncti faciunt, pretio mox deinde reperto,
Mirantes summo proceri certamine laudant. (0376C)
Iamque adeo patriae subeuntes limina sedis,
Gratatur reduces genitor, unumque requirit.
Omnia cognoscens, nummosque, et dona capessit,
1295Conquestus graviter, alium iam defore natum.
Accisi cum deinde cibi, advectaque farra
Cogebant rursus pretiis alimenta parare,
Sed revocare gradum Memphis mens non erat ulli,
Ni minimum fratrem secum pater ire iuberet.
1300Quem cum plura gemens nollet dimittere quoquam,
Rubenus fido germanum postulat ore,
Securus gemina committens pignora patri.
Prosequitur Iudas, sese nec posse reverti
Proclamat, rigidi testatus verba Iosephi.