Claras laudes ac salubres posco, fratres, dicite,
Quas proferre cogit apte nunc sanctorum gloria.
112.1663C| O victores gloriosi his ovate laudibus.
Quot virtute Regis almi fortes vidi martyres?
Marcellinus atque Petrus jam vicerunt saeculum.
O victores gloriosi, etc.
Quos arx orbis et regina Roma quondam protulit,
Ipsa misit ad supernum Regis Christi solium.
O victores, etc.
Exorcista Petrus exstat, Marcellinus presbyter,
Plebem sacram convocantes ambo Christo praeparant.
O victores, etc.
Verbo curant ac medelam aegris praebent artubus
112.1664A| Ex insanis foras arcent vim horrendam daemonis.
O victores, etc.
Qui torquentur caesi flagris, exarantur unguibus,
Vincti tetro hi catenis includuntur carcere
O victores, etc.
Nam in cippo Petrus arcto, Marcellinus crustulis,
Fracti vitri decubando toto nudus corpore.
O victores, etc.
Judex ater quos Serenus certat poenis vincere,
Illi laudes valde dignas Christo Regi personant.
O victores, etc.
Qui de coelis misit ipsis mox solamen angeli
Ut de vinclis liberati, quoquo vellent pergerent
O victores, etc.
Ipsi vero roborati confortati martyres
112.1664B| Post Sereno jam parati praesentari festinant.
O victores, etc.
Tunc Serenus turbulentus valde iratus praecipit,
Ut in silva tracti foras truncarentur candida.
O victores, etc.
Quo profecti gratulantes celsa scandunt sidera,
Laudes illic sempiternas Christo dicunt principi.
O victores, etc.
Hoc hymnista carmen offert pauper vobis, martyres,
Qualecunque sit tenete, servus vester obtulit.
O victores gloriosi, his ovate laudibus.