(0777A)
Miti September praegustans pocula Baccho,
Quos aris venerando colat memoretque canemus.
[Kal.] Legifer haeredem proprii quem linquit honoris
Promissam populo terram, qui sorte per astra,
Per loca, per celsos montis distinxit et urbes,
Septembres Josue tenet orditurque Kalendas
Priscus, et has martyr trabeatus sanguine lustrat,
Praesul et his Senonum Lupus aede coruscat ab alta,
Has et Verenae rutilant solemnia sanctae.
[IV non.] Quartas hinc nonas Lugduni Justus honorat.
[III non.] Ternis Antonine puer martyrque triumphas,
Tunc et Aristeus antistes de morte beatur.
[II non.] Legis divinae lator, susceptor et autor,
Colloquio visuque Dei dignate frequenti,
Praecelso pridie tumularis monte Moyses,
Nulli post licuit cujus cognoscere bustum,
Tunc etiam Cabalon Marcelli sanguine vernat.
[Nonae] Nonis Ferreolus cum Ferrutione refulget,
Donatus Capuam pariterque Arcontius ornant.
[VIII id.] Vates Zacharias octonas obtinet Idus.
[VII id.] Antistes septenas servat Evortius, atque
(0777B)Regali insignis Chlodoaldus stirpe sacerdos.
[VI id.] Qua Deus humanam suscepit virgine formam,
Illustrat senas ortus de luce Maria,
Martyr et Adrianus Romam tum sanguine comit.
[V id.] Gorgonius quinas fama meritisque retentat,
Romae quem passum nunc Gallia poscit adorans.
[IV id.] Sosthenes et Victor quartis memorantur eamdem
Christi pro regno sortiti et laude coronam.
[III id.] Prothus hinc ternas, fraterque Hiacynthus honorant.
Qui Eugeniam pariter legem docuere sacratam,
Has simul et Felix felici morte dicavit,
Martyrio Regulae juncto pariterque beatve.
[II id.] Martyr mox pridie Celsus petit aethera Syrus.
[Idus] Idibus abba nitet merito et cognomine Amatus.
[XVIII k.] Octono et decimo octimbrem vocitante futurum,
Exaltata crucis fulgent vexilla relatae,
Perside ab indigna victor quam vexit Heracleus,
Corneliusque suam virtute et sanguine Romam,
Antistes fulcit, et Cypriano laeta coruscat
Carthago, insigni doctore et martyre, totum,
Ecclesiae scribunt, cujus sacra dicta per orbem,
Praesulis hic etiam meritum celebratur Eparci.
[XVII k.] Septenum denum Nicomedes presbyter ornat,
(0777C)Virgo tuus Petronilla comes martyrque beatus.
Pontifices ara meritis vitaque colendi,
Carnutes Leobinus, Aper, Leo quosque tuentur.
[XVI k.] Hinc sextodeno Martinus papa beatur,
Euphemiamque pio sanctam veneramur amore,
Lucius hoc simul excellet cum Geminiano,
Condecorat pariter passos quos laurea Christi.
[XV k.] Lantpertus quintum denum virtute coronat,
Factio quem caesum semper tremebunda pavescit.
[XIV k.] Ore, fide antistes, signis et sanguine martyr
Methodius, quartum denum celebrandus honorat.
[XIII k.] Virtutis specimen patiendi, et forma decusque
Martyrii Eustathius terno denoque triumphat.
[XII k.] Virgoque bissenum Fausta atque Evigilasius ornant.
Deseruit Christo, mundi qui lucra, vocante,
[XI k.] Undecimum Matthaeus Evangelico ore sacravit.
[X k.] Mauricius denum socia legione coronat,
Effuso mortem pariter quae sanguine vicit,
(0778A)Emmerammus eum socio comitatur honore,
Quem genus insignis Britannia voce reposcit.
[IX k.] Nonum Tecla tenet, roseo perfusa cruore,
Liberiusque dicat Romanam papa per urbem
Levita et Sosius merito splendescit honore.
[VIII k] Octavum sterili conceptus ventre Joannes,
Andochiusque sacrat martyrque et presbyter almus,
Quem Tyrsus, Felixque pari comitantur amore.
[VII k.] Septeno Lupus antistes Lugduna revisit
Moenia, devotae pastor memorabilis urbi,
Ambiana micat Firmino martyre plebes.
[VI k.] Sexta martyr ovat Cyprianus, virgo beata
Quem Justina Dei fecit cognoscere regnum,
Artibus insanis tandem furiisque relictis.
[V k.] Quinto cum fratre excellet Cosma, Damiano.
Antimus hos sequitur, Leontius Euprepiusque,
Qui unum Christe tibi sertum, qui morte dicarunt,
[IV k] Faustus, Martialis, quartum et Januas ornant,
Martyrii trabea simul et certamine clari.
[III k.] Aetheria virtute potens princepsque supernae
Militiae Michael terno sibi templa sacravit.
[II k.] Interpres legis veterisque novaeque probatus,
(0778B)Instructor doctrinae, haeresis damnator iniquae,
Hieronymus pridie Septembrem claudit ovantem.
Aequatura diem Soli cum Libra inhaeret.
Libra pares lucis somnique hic efficit horas.
Sidere virgo tuo Bacchum September opimat.
September lectos terit hic cum fuste corymbos.