(0773C)
Augustus demum pleno jam farre refertus,
Quis nova sacra ferat monstremus carmine sanctos.
[Kal.] Quos ferus in mortem Antiochus cum matre subegit,
Venturo sanguen, qui Christo sponte dicarunt,
Augustas retinent Machabaei jure Kalendas,
Carcere Roma Petrum celebrant vinclisque reductum,
(0774C)Eusebiumque suum Vercelli rite frequentant.
[IV n.] Nonarum Stephanus martyrque et papa beatus,
Quarto festivae tribuit pia gaudia Romae.
[III n.] Terno mox Stephani colitur solemne reperti,
Primus qui mortem Christi est moriendo secutus,
Gamaliel, Nicodemus, Abibon pariterque
Inventi voto fulgent et laude perenni.
[II n.] Justinus pridie proprio celebratur honore,
(0775A)Presbyter in numero sanctorum caede peremptus
Crudeli exquirens tumulis qui condecoravit.
[Nonae.] Nonas Cassianus, Memmius atque Osvaldus
Rex pius Anglorum merito et virtute retentant.
[VIII id.] Idibus octonis mortem passura, crucemque
Christi sancta caro aetheream dedit ante figuram,
Praesul et his Sixtus Romae martyrque colendus,
Juxta et Felicissimus Agapitusque triumphant.
[VII id.] Septenas pariter Donatus et Afra bearunt.
[VI id.] Aethereum senis penetrat Cyriacus honorem.
[V id.] Romanus quinis martyr milesque refulget.
[IV id.] Quartis Laurenti merito splendescis opimo,
Ignem qui passus tortorem vincis iniquum.
[III id.] Ternis flosque decusque pium petis astra, Tiburti,
Has et Goaricus confessor possidet almus.
[I id.] Martyrii palmam pridie capis, Euple, perennem.
[Idus.] Idibus Hippolytum comitem Laurentius astris,
Pro Christi parili recipit certamine passum,
Reginam meritis virtute fideque colendam
Tellus tum venerans Radegundam Aquitana frequentat.
[XIX k.] Quae decima et nona est Septembris ante Kalendas
Eusebium Romae sancit celebratque beatum.
(0775B)[XVIII k.] Octava et decima mundi lux flosque Maria
Angelico comitata choro petit aethera virgo.
[XVII k.] Septenam denamque tenes, Arnulphe, sacerdos.
[XVI k.] Martyre sedecima effulget Mammete beato.
[XV k.] Agapitus quintamdecimam certamine sancit.
[XIV k.] Magnus et Andreas quarta denaque coruscant,
Septem nonaginta et quingenti comitantur,
Quos pariter sancti simul his bis mille sequuntur.
[XIII k.] Tertia post denam Samuele excellet ab ipsis,
Quem Domino cunis genitrix devota sacravit.
[XII k.] Martyris hinc duodena privati sanguine vernat.
[XI k.] Undecimam Romae Timotheus passus honorat,
Aeduatumque suum celebrat plebs Symphorianum,
Mater quem Christo pariter moritura dicavit.
[X k.] Lucius et Ptolemaeus denam virtute coronant,
[IX k.] Bartholomaeus nonam exornat retinetque beatus
India quo doctore Dei cognovit honorem,
Herculis et Bacchi insanis vix eruta sacris,
Hinc illum fama est varia pro sorte sepulcri,
Aeoliam, Laparen, Beneventi et templa tenere,
Tum quoque Genesio resplendet martyre Roma,
Audoenum tumque pium Radumagus honorat.
(0775C)[VIII k.] Octava hinc Arelas celebrat te, sancte Genesi.
[VII k.] Martyrio septenam Irenaeus et Abundus ornant.
[VI k.] Rufe, tuos recolens ostendit sexta triumphos.
(0776A)[V k.] Hermen quinta probat felici morte beatum.
Ecclesiae lumen, populi sacra norma fidelis,
Africa quo pastore orbis doctore coruscat,
Augustine pater, festo celebraris eodem,
Aurea quem servant Italis nunc templa sepultum,
Santonus alta sui Vibiani hac fulget honore,
Urbs Alamannorum recolit Constantia sanctum,
Hac quoque Pelagium fuso pro sanguine clarum.
[IV k.] Praeco Dei, Verbi vox et Baptista Joannes,
Quem effera saltanti tribuerunt jussa puellae,
Insignit quartam meritorum laude perenni,
Virgo Sabina simul Romae sua templa revisit.
[III k.] Terna cum Felice pio praecellet Adauctus.
[II k.] Paulinus pridie Treverorum moenia lustrat,
Exsilio antistes vero pro dogmate clarus.
Augusti his demum clauduntur limina festis.
Augustum mensem leo fervidus igne perurit.
Augustus metit, et fruges in horrea mittit.
Herigone hic Phoebo sociat sua sidera Virgo.
His quoque consurgit Autumni tempora laeti.