(0759B)
Primum nunc Jani vocitatum nomine mensem,
Unde sacratus eat, recolatque festa canemus.
[Kal.] Quod veteres coluere patres, umbramque futuri,
Exposuit sancta Christi de Virgine nati,
Circumcisa caro, jam sacrat ecce Kalendas,
Basiliusque sacer meritorum splendet honore:
Euphrosyna simul nitet Almachiusque beatus.
[IV n.] Macarius quartum Nonarum dedicat astum,
Qui tenuit docuitque eremi pius accola morem.
[III n.] Tertia Nonarumque dies celebrat Genovefam.
[II n.] Tum pridie Nonis augenti festa recurrunt,
[Nonae.] Hinc Nonas Simeon confessor possidet almus,
Papa Telesphorus iisdem pariterque coruscat,
[VIII id.] Octavo ante Idus agitur Theophania sanctum.
[VII id.] Septima ab Aegypto Christum celebratque relatum,
Antiochena suum recolit quoque plebs Lucianum.
[VI id.] Iduum post sexto Eugeniano vota feruntur.
[V id.] Quinto Vitali, Fortunato et Revocato.
[IV id.] Quarto Melciades Paulusque eremita beato,
Sublati fine aetherea laetantur in arce.
[III id.] Salvius hinc ternas Carthagine consecrat Idus.
[II id.] Plebs Itachia suum pridie recolit Cyriacum.
[Idus.] Idibus Hilario Pictavae militat urbis,
Plebs devota suo pastor quam fulcit honore.
[XIX k.] Quam nonam et decimam constat Februi ante kalendas
Esse diem, felix sacer et confessor adornat.
(0760B)[XVIII k.] Bisque novenam Habacuc simul et Micheas honorant.
[XVII k.] Septima post decimam Marcelli martyris, atque
Pontificis summi meritis, et nomine fulget.
[XVI k.] Sextaque cum decima Antonii virtute dicatur:
Haec etiam socio geminorum pollet honore
Lingona quos uno celebrat plebs marmore tectos.
[XV k.] Quinta et dena simul Prisca pro martyre gaudet.
[XIV k.] Bis septena Niceto Hautmaroque coruscat.
[XIII k.] Tertia post decimam Fabiano praesule floret,
Cui parili Sebastianus virtute cohaeret,
Roma quem vectum nunc Suessio laeta frequentat.
[XII k.] Bis sexta est Agnes, quam virgo et martyr honorat.
[IX k.] Undecimam Levita sacer Vincentius ornat,
Huic et Anastasium virtus conjungit opimum.
[X k.] Post Emerentianae decimo laus emicat ampla.
[IX k.] Nono martyrium Babilae virtusque coruscat.
[VIII k.] Octavo ex seclo conversum gloria Paulum,
Projectumque suum celebrans Arvernus adornat.
[VII k.] Septima moxque dies Polycarpi sanguine fulget,
Smyrnae quem vero celebrant pro rege crematum.
Punica terra suum sexto veneratur annum,
[VI k.] Sulpitius, Bathildis et Adelgund quoque vernant.
[V k.] Quintum progenies Romana Agnae dicat almae.
[IV k.] Quarto martyrium Papiae Maurique refulget.
Tunc et Valerio Treviri pro praesule gaudent.
[III k.] Tertia quod Hippolytum Antiochenae personat urbi.
[II k.] Saturnine tuum egregium Thyrsique tropaeum,
Victorisque simul jam determinat orbem.
(0761A)Principium Jani sancit tropicus Capricornus.