(0763B)
Martius insigni feriatus tempore demum,
Quorum praemineat breviter dicemus honore.
[Kal.] Martis Donatus tenet Albinusque Kalendas.
Senis mox Nonis Heraclus Paulusque coluntur.
[VI non.] Quinas Magra pio Nonas defendit amore,
[V non.] His et Emitherius Celedonius atque Marinus,
Asteriusque micant effuso sanguine clari.
[IV non.] Lucius hinc papa pretiosa morte quaternis,
Martyrum et octingentorum turba optima fulget.
[III non.] Ternas martyr habet meritorum nomine Phocas.
Sanguine qui mortem vicit, virtute draconem.
[II non.] Victorinus ovat pridie Victorque retrusi
Carcere, qui celso penetrarunt astra volatu.
[Nonae.] Nonis Felicitas micat, et Perpetua, castam
Quae Christo vitam felici morte dicarunt.
[VIII id.] Idus octavas martyr Cyrillus et una
Consimili retinet venerandus honore Rogatus.
[VII id.] Septenis quadrageno sub milite festum
Armeniae recolunt unum sacra templa minoris.
[VI id.] Senis Gaius, Alexanderque coluntur eisdem,
Quadragena et bina cohaeret turba cruore,
Quos pariter saeva celebramus Perside caesos.
[V id] Candidus hinc quinas sibi Valeriusque retentant.
(0764B)[IV id.] Quartam mox Iduum finis tuus, alme Gregori,
Consecrat aeterna coelum quo laude petisti.
[III id.] Presbyter et ternas Macedonius implet honesta
Conjuge Patritia et nata comitante Modesta.
[II id.] Euphrosius pridie Petro cum martyre fulget.
[Idus.] Thessala plebs Idus matrona martyre servat.
[XVII k.] Septima post decimam Aprilis de more kalendis
Praecedens Cyriaci et Largi splendet honore,
Smaragdique simul pretioso sanguine vernat.
[XVI k.] Bis octona tuo Parici nomine pollet,
Scothica gentilem miserate per oppida cultum,
Hac quoque Getrudae redduntur vota beatae.
[XV k.] Praesul Alexander ter quinam possidet altam,
Presbyter et Romam Pigmenus sanguine lustrat
[XIV k.] Bis septena Joanne eremi cultore coruscat.
[XIII k.] Tertia cum decima Gutbretti laude nitentes
Anglorum ducit per mystica gaudia plebes.
[XII k.] Tum duodena fide Benedicti et nomine fulget,
Coenobiale decus duce quo laetatur in orbe.
[XI k.] Undecima antistes tribuit pia lumina Paulus,
Quo jure exsultat proprio Narbona magistro.
[X k.] Felix hinc decimam et Theodorus cum Juliano
Ornant eximia virtutum laude ferendi.
[IX k.] Romulus et nonam pariterque Secundulus implet.
(0765A)[VIII k.] Angelus octava venturum nuntiat Agnum,
Agnus et ipse cruce mundi pro morte levatur.
[VII k.] Septima Montanum memorat cum conjuge sancta,
Atque simul quadrageno cum martyre passum.
[VI k.] Agni surgentis resplendet sexta triumpho.
[V k.] Quinta Priscus, Alexander Malchusque coluntur.
Hanc quoque Guntrammus migrans rex optimus ornat.
[IV k.] Eustathius quarta virtutis laude coruscat,
Abba Columbano nituit Quirite magistro.
[III k.] Tertia Domnino comite et Victore refulget.
[II k.] Diodolus pridie emicat Anesusque beati,
Hic Martis volvens determinat orbita mensem.
Martius hic falcem retinens vult caedere vitem.