Quaeris, cur veniam tibi tardior. aurea Phoebi
Porticus a magno Caesare aperta fuit.
Tota erat in speciem Poenis digesta columnis,
Inter quas Danai femina turba senis.
Tum medium claro surgebat marmore templum,31.5
Et patria Phoebo carius Ortygia.
Et duo Solis erant supra fastigia currus,
Et valvae, Libyci nobile dentis opus,
Altera deiectos Parnasi vertice Gallos,
Altera maerebat funera Tantalidos.31.10
Deinde inter matrem deus ipse interque sororem
Pythius in longa carmina veste sonat.
Hic equidem Phoebo visus mihi pulchrior ipso
Marmoreus tacita carmen hiare lyra,
Atque aram circum steterant armenta Myronis31.15
Quattuor artificis, vivida signa, boves.