At vos incertam, mortales, funeris horam
Quaeritis, et qua sit mors aditura via:
Quaeritis et caelo Phoenicum inventa sereno,
Quae sit stella homini commoda quaeque mala.
Seu pedibus Parthos sequitur seu classe Britannos,27.5
Et maris et terrae caeca pericla viae:
Rursus et obiectum fletis capiti esse tumultum,
Cum Mavors dubias miscet utrimque manus:
Praeterea domibus flammam domibusque ruinas,
Neu subeant labris pocula nigra tuis!27.10
Solus amans novit, quando periturus et a qua
Morte, neque hic Boreae flabra neque arma timet.
Iam licet et Stygia sedeat sub arundine remex,
Cernat et infernae tristia vela ratis:
Si modo damnatum revocaverit aura puellae,27.15
Concessum nulla lege redibit iter.