Est cerefolio vis acris et ignea valde.
Appositum cancris tritum cum melle medetur;
cum vino bibitum lateris sedare dolorem 930
saepe solet, tritam si nectis desuper herbam.
Cum mulsa bibitum pituitae noxia solvit,
ex oleo coctum frigus depellit inunctum,
si tritum mixto violento solvis aceto
lumbricos tali potu tineasque repellis,935
cum vino ciet urinas et menstrua purgat.
Virgine cum cera vetus huic axungia mixta
non modo parotidas verum quoscunque tumores
curat vel reprimit, si saepius hoc superaddas.
Intinctum valido si manducetur aceto 940
saepe solet vomitum ventremque tenere solutum;
si trito tegitur pecten succusque bibatur
urinae clausos reserat quoscunque meatus;
illius elixatura vertigo fugatur,
si caput hac tepida patientis saepe lavetur 945
herbaque temporibus et fronti cocta ligetur.