Frigida vis herbae coriandri dicitur esse,
austeraeque simul quiddam virtutis habere
hanc Galienus ait, per quam depellere ventre
lumbricos tineasque solet, si trita bibatur 960
cum vino vel si mixto sumatur aceto.
Uva cum passa coriandrum melque jugatum
sedabunt varios superaddita trita tumores,
praecipue testes tumidos juvat hoc medicamen.
Illius semen ventrem stipare solutum 965
fertur, aquae junctum fuerit si saepius haustum.
Argenti spumam cerussae contere mixtam
his tritis succum coriandri junge et acetum,
quattuor his roseum miscendo jugabis olivum,
ista terendo simul pretiosum conficis unguen,970
quo sacros ignes pellas calidosque tumores;
si tibi difficilis confectio tanta videtur,
succus cum solo prodest commixtus aceto;
aut si frumenti panis mundissima mica
jungitur huic succo sedat quemcunque calorem. 975
Huic succo si juncta fabae sit sola farina
et superaddatur scrophis medicabitur illis
et cedet fervens emplastro pustula tali.
A multis scriptum legitur: febris ante tremorem
si tria grana voret coriandri seminis aeger,980
evadet febrem cui dat lux tertia nomen;
praestat idem lectum coriandrum mane priusquam
sol surgat cervicali si subditur aegri.
Xenocrates scripsit totidem cessare diebus
menstrua quot mulier coriandri grana vorabit. 985
Assiduum quidam condemnant illius usum,
nempe putant mortem quemvisve parare dolorem.