Esse putant medici calidum siccumque cyminum
tertius est illi gradus in virtutibus istis.
Assumptum quocunque modo depellere tradunt
viscera vexantem ventum stomachumque gravantem;
et digestivum stomachi jecorisque calorem 2115
excitat, et veneris credunt inhibere furorem,
et fluxum ventris in aceto stringere coctum.
Hoc orthopnoicis miram praestare medelam
experti dicunt cum pusca saepius haustum,
atque venenosis cum vino morsibus ipsum 2120
praebet opem, tritumque fabae cum polline juncto
melle tepente solet testes curare tumentes
appositum; sistit cum pusca menstrua sumptum,
dicunt pallentem dare mansum saepe colorem.