Chamaedryos graece, quae gamandrea latine
dicitur; hanc herbam calidam siccamque fatentur,
tertius est in utroque gradus. Depellit abortum 1905
si mixta potetur aqua, tussique medetur,
conquassata juvat; si mixta bibatur aceto,
splen siccat; purgat cum vino menstrua sumpta;
hydropicis in principio sic sumpta medetur,
sic quoque pestiferis occurrit morsibus illa. 1910
Cunctis praedictis prodest superaddita trita;
sordens purgabit vulnus, licet inveteratum,
si cum melle teras et tritam desuper addas.
Chamaedryos oculi succo cum melle peruncti
dicuntur clari dempta caligine reddi;1915
si tritam misces oleo corpusque perungas,
pellet frigdorem, revocabit et ipsa calorem.