135.0515|
135.0515B| Quamvis huc quondam, sceleris cogente reatu
Persarum ductor, dum circumquaque jacentes
Proterit ense plagas, crudele induxerit agmen,
Templa solo sternens, loca caedibus alma profanans:
Ornamenta ferens cum quis vexilla beatae
Praedatus crucis, abducit, rutiloque metalli
Luce throno sociat. Mentitus jura Tonantis
Sceptra indigna parat, modico deus aethere visus.
Strenuus at princeps Romani militis, usus
Vi belli, fultusque Dei tutamine veri,
Agmina semiviri frangit, penetralia rumpit,
Inclusum aere deum mortalem caede recludit.
Addictos subigit cuneos ac diva reducit
135.0516B| Signa, dato cujus gaudet virtute tropaeo,
Et Solymam revehit. Coelis divina patrantur.
Prisca novis reparata nitent miracula votis
Mortuus ad vitam vitae per ligna recurrit.
Quattuor assiliunt, longo languore soluti,
Purgati numero leprosi corpora pleno
Munda notant, ter quinque vident magnalia caeci:
Daemones expulsi numerosa habitacula linquunt
Pluribus et plures morbi fugere relictis,
Romulidum exsultat ductor largasque profundit
Pronus opes, fabricis reparans sacraria dignis,
Exhortansque patres, decernit agenda quotannis
Festa crucis, celebresque dein veneramur honores.