135.0523|
135.0523A| Asterius quidam praesens erat, urbis alumnus
Romae, patricius natu, splendore senator,
Ornatus meritis, opibus feliciter utens,
135.0523B| Nobilitate vigens, regali stemmate pollens,
At super haec fidei Christi praecelsus amore.
Is praetaxati dum martyris astat agoni,
Excipit et caesum gladio, attollitque verenter
Subjectis humeris, substrata et veste, cadaver
Testis et exsequiis quem dat, mox captat honorem.
Traditur hic multis aliis quoque fulgidus actis,
E quibus id per eum tradunt memorabile gestum.
Paneadam quam Phoenices antiquitus urbem
Dicunt, Caesaream nostri dixere Philippi;
Panius hanc prope mons, cujus radicibus ortus
Jordanis gemino asseritur procedere fonte:
Moris erat mactaretur quo victima certo
Solemnique die fatuis a gentibus illic
Daemonicae, fuco quae fraudis adempta dolosae,
Vanescens, oculis nusquam parere solebat,
Famaque suadebat praesentibus, hostia celsi
135.0524A| Quod mirabiliter peteret penetralia coeli
Contigit Asterium, quondam deceptio talis
135.0524B| Dum geritur, casu praesentem astare profanis
Praestringique videns stupidas phantasmate mentes,
Erroresque dolens hominum, miseratus et orans
Ingemit, atque oculos coelis palmasque repandens,
Invocat interno Dominum clamore potentem,
Integraque fide poscit, lacrymisque profusis
Flagitat, antiqui fallaces arguat artes
Serpentis, miseris removens mortalibus hujus
Praestigii nebulas, arcanaque monstra revelans.
Haec rogitante piis precibus cum fletibus almo,
Ecce superferri subito depromitur anguis,
Victima divinis sublata putata rapinis
Reddita, cunctorum fluvii conspectibus imo.
Sic fidei prece Christicolae resoluta fatiscit
Aetatum falsi tantarum machina ludi,
Ut non hisce locis reparari quiverit error
Amplius, hic clari patefacto lumine veri.