135.0645|
135.0645A| Post Sixtum Romae solium Telesphorus ornat,
Juris apostolici delectus ut anachoreta
Angelica populos quam vasta per egerat arva
Instrueret vita, sobrii qui tradere belli
Instrumenta viris fervens, praecedere sanctum
Quae tenet Ecclesia statuit jejunia, Pascha;
Natalis peragi Christi mysteria nocte,
Tertia nec praeter nisi candeat hora diei
Qua crucis aethereus subiit miracula fulgor,
Hymnus et angelicus monet inter sacra resultet.
Hinc martyr renitens claroque in fine triumphans
Conditur ad sancti sanctus sacra pignora Petri.
135.0646A| Successor clerum disponit et ornat Hyginus;
Hac quo perfuncto per quattuor inditur annos
Sede, Pius vita celebri cognomen honorans,
Pastoris frater pietate ornatus uterque.
Istius sub episcopio librum edidit Hermes,
Quem primae Pauli schedae mandata salutant,
Angelici sibimet monitus data jussa revelans;
Pascha die trahit a Domino qui nomen agendum
Schemate pastoris, hoc coelicola imperitante,
Quique legi Graiis solitus per publica templa,
Credi Hieronymo dignus testante libellus.