135.0665|
135.0665A| Antheros hujus exsulantis culmina
Capessit alta prosequens vestigia.
Hic digna diligenter acta martyrum
Causa beati mortis almae Maximi,
Qui carne martyr ac sacerdos solvitur,
Notat requirens ac recondit in sacra;
Quorum meretur, Maximino principe
Nostros agente post Neronem turbinis
Sexti retecta lege, contubernia,
Quae lata decessoris odio Caesaris,
Cujus pio nitebat aula nomine
Mamma mater quam fovebat strenue,
135.0666A| Grassatur almos dira contra praesules
Clerumque sacrae celsa plebis regmina,
Tribusque in annis fine regis clauditur.
Vindicta cujus turgidos in principes
Illata juste, ceu lues Aegyptios
Turgore sexti lancinavit verberis.
Nempe hoc perempto Puppieni cuspide,
Cum fratre regnans caesor ipse caeditur.
Nostri quot annis enecati praesules,
Datis tot orbis ad necem primatibus:
Hinc Gordianus bella spectat prospera.