135.0859|
135.0859C| Italicam Christina Tyrum Vulsinaque comens
Littora multiplici decoravit agone triumphum
Quae tenera gliscens aetate virilia tractat,
Aggrediensque deos robusta puella paternos
Vertit, comminuit, spargit, largitur egenis,
Confortata Deo divoque virilis amore.
Quam pater affligens alapis dat verbere carpi,
Disceptamque flagris dat ferro in carcere necti.
Affectus patrios rabiemque experta parentis,
Dum saevo longoque fluunt laceramine carnes,
Has illa in patris ora serens sata viscera reddit
Carnifici, mentem supero librat alta satori.
Annexa inde rotae tormenta flagrantia volvunt
Ignibus applicitam pinguique liquore madentem;
135.0859D| At Christo fugiens attingere membra dicata
Erumpensque globis oleo furit excita turbis
Flamma, truces spectatores saevasque catervas
Involvens, fervore necans, plexuque perurens.
Carceris hinc thalamo duroque recepta cubili
135.0860C| Coelestis fruitur pastus splendore, medela
Sanatur, medicante Deo, divo utitur actu.
Incolumis Christique reperta extollere laudes,
Pressa gravi vastis onerosi pondere saxi,
Gurgitibus sinibusque lacus immergitur imis
Angelico sed praesidio superoque vigore
Eruta crudelis vincit molimina patris.
Post alius fortem subit expugnare puellam,
Tartarei ductor belli diraeque palaestrae,
Suppliciisque petens decus insuperabile multis,
Phoebum orare jubet, cujus simulacra favillam
Illa repente facit precibus dum sidera transit.
Quae mirata trophaea Deum mox millia Christum
Subdita collaudant figmentaque vana relinquunt.
135.0860D| Successore patris prostrato, bella tyrannus
Tertius aggreditur flammasque extinguere flammis
Nititur accedens Vulcani horrore caminos:
Clauditur invicta ardenti fornace virago,
Sicque cinis penitus fieri data quinque diebus,
135.0861A| Ignibus immunis scelerum necat atra vaporum
Edomitisque focis perstat Christi hostia victrix.
Quod nequeunt clibani dantur supplere chelydri;
Marcescunt tamen aetherei virtute triumphi,
135.0862A| Verborum gladius plectrumque abscinditur oris,
Interior sed plena serit praeconia lingua;
Impetitur saevis totiens decorata sagittis,
Bellatrix pulsa et jaculis mens emicat astris.