135.0807|
135.0807C| Tertius huic fastu Leo mox succedit et actu.
Scripturis pollens, animi probitate renidens;
Viribus invictis, lepido sermone disertus;
Mentis honore catus, pietatis munere largus.
Aegrotos refovens, solaminaque apta ministrans.
His renitens opibus, charus populoque Deoque,
Erigitur propere scandens ad summa cathedrae.
Hic humilis quoque mansuetis, durusque superbis
Prodigus abjectis miserendi, justus iniquis.
Ampliat augmentans cleri ecclesiaeque decorem.
Aurea dona Petro gemmas, pallasque, coronas
Multiplicans, aulae pariter tegumenta reformat,
Luminibus lustrans multis, rutilisque figuris.
Hoc Pauli irradiat, hoc plurima templa nitore,
135.0807D| Ponderibus fabricisque opus exaequare patroni,
Vel superare studens, numerosa dote laborat.
Non fert invidiam rabidus celare chelydrus.
Apparat insidias, laqueos atque arma ministrans,
Instruit occultas fucato figmine fraudes,
135.0808C| Applicat obsequiis praestructos felle draconis.
Officium praestant, et melle venena colorant.
Inter vota precum laudisque insignia, diros
Expromunt gladios, saevisque furentibus ursis
In gregis auctorem, plebes sparguntur ovinae
Insiliuntque ferae doctoris in arietis ora.
Unguibus insonti pollutis sanguine fervent
Dilaniare sacras truculento pollice malas,
Irrupta geminas exstinguere fronte lucernas,
Faucibus eductum sacrorum vellere plectrum.
Nec satis est ori semel injecisse mucronem.
Cruda manus loca muneribus vacuata retentat,
Plagisque affectum variis multoque cruore
Respersum rapiunt, tractumque sub antra retrudunt;
135.0808D| Custodes adhibent laceram defendere praedam.
Verbere tentatum sed non miseratio summa
Deseruit famulum, Petrus nec sprevit alumnum.
Redditur huic coelo lumenque refunditur actum,
135.0809A| Reflagransque pares lux intrat mira fenestras,
Elinguis loquitur, redeunt linguae organa secto.
Insuper accumulat Rector suffragia passo,
Admittitque viros Patrem revocare fideles.
Arcibus atque Petri cernente, loquente relato,
Excelsus benedictus, agens miracula solus,
Acclamat populus, laudans promissa ferentem;
In se fidenti cui fit lumenque, salusque,
Os et lingua Deus, tutans et numine firmans,
Confortansque virum, felicia gaudia dando
Devotis, tremebunda feris discrimina belvis.
Nec saevire tamen scelus aut supplere quiescunt.
Irrepunt domibus, praedis bacchantur et armis.
Providet at Dominus rapto solamina servo:
Spoletique ducem cuneorum robore septum
135.0809B| Dirigit obsequiis, mirantem munera coeli.
Quae passum respersa ruunt invisere cives,
Diversique gradus, aetates, vulgus, honores
Urbibus Hesperiae pro mira tropaea serentes.
Haec quoque trans Alpes in Gallica rura resignant,
Stipantes Patrem supero splendore micantem.
Clarificant divina pio magnalia regi.
Qui proceres genitumque suos praecedere gressus
Legans, ipse celer sequitur fieri obvius altae
Virtutis sacro clarissima dona ferenti.
Undique laus roboat, tonat undique gloria Christo,
Hymnisonis mistus grates laudesque frequentat
Rex turmis; refluunt lacrymae per gaudia fusae.
Magnificatur opus populis mirabile Christi,
135.0809C| Fertur apostolicum palmae super aethera culmen,
Et Petri famulus digno celebratur honore.
At furor immitis vacuos tutore per agros
Sacrilego luxu grassatur et ignibus atris:
Augmentansque malum furtis furit insidiarum,
Fraudibus insequitur pulsum lacerantibus hostem.
Nec longum sedet almus apex absente duello.
Hoste quati caeco maculari crimine furvo
Haud patitur; bellum repetit, campumque reposcit,
Exsertusque urbem positumque retentat agonem.
Comperto ducis adventu, grex obvius ire
Pastori fervens properat; simul agmine facto
Egregii Patres, clerus, claraeque catervae
135.0809D| Dividui sexus, variae regionis et oris,
Laudibus attollunt celebrantque acromate Patrem,
Culmineque exceptum suprema sede reponunt.
Fascibus ille licet pollens, objecta piare
Haud renuit, dat se inquiri, dat et hostibus ausum
Dicendi. Nihil adversus dum tramite veri
Ferre queunt, Francis tandem censoribus acti
Mittuntur regi: Karolus quoque cognitor urbem
135.0810A| Aggreditur, primosque vocat sacri ordinis, atque
Stemmatis Aeneadum Teucrorum et lumina regni.
Nec tamen ulla Petri censent fastigia sedem.
Immunis haec cunctorum se crimine cunctis
Expiat applicitis. Proceres praeconia Christo
Laeta ferunt, regique poli natale frequentant.
Laudibus eximiis summique nitoris honore
Sumit apostolica augustam rex sede coronam.
Conclamatur honos Romanis Patribus auctus,
Imperiique nitent Francorum sceptra decore,
Regis et ad regnum genitus sacro unguine surgit.
Rex mensas argento offert rutilante coruscas,
Aurea vasa super gemmis stellantibus addens,
Altar cum basibus radians, et tegmine culto
Crux claris Evangeliumque micant hyacinthis.
135.0810B| His Christus donis, Genitrix, proceresque coluntur
Sacrilegi dantur lanii, censente senatu
Exsortes agris, alterna piacula fassi.
Pace fruens praesul, fabricis ac cultibus instat,
Impensisque piis non cessat comere templa,
Muneribus, velis, aris, vasisque, lavacris.
Pauli tecta soli subito collapsa tremore
In melius revocat, cultuque reformat honesto.
Haec et multa subhinc numerosis dotibus augens,
Jura precum cumulat, servandaque Gallica tradit
Ascendens iter Domini praeeuntia vota.
Sic decus Ecclesiae postquam fervente propagat
Assiduus nisu, pietatis munere; compta
Emeritus superi splendoris sumitur aula.
De Stephano quarto.
135.0810C| Extulerat gradibus Stephanum, conscendere cernens
Moribus ac probitate virum cui cura tenere
Actibus et vita, verbi quae luce serebat
Utilis unde sacris aptusque Petrique probatus,
Ferre vicem dignus divae praeponitur arci.
Servandaeque studens paci, firmandaque jura
Ecclesiae curans, Francorum illustria promptus
Regna petit, cui celsa piis mox regia servit
Obsequiis culto, donisque potentibus uso.
Effert hinc nostram coeli, qua Francica lumen
Gens subiit fidei Ecclesiam, Remense venustans
Officiis templum: Lodowico stemmata regni
Caesareosque addens augustae lucis honores,
Remigiique apicis fastu sublimat alumnos.
135.0810D| Caesare quae poscit meritis gaudente capessit:
Insuper accedunt donorum insignia macto.
Quin etiam sedes et jura domestica confert
Imperii consors Romani et culminis haeres,
Haeredem faciens in Francica praedia Petrum.
Papa Redemptoris sectans vestigia servis
Crimina laxantis, sublataque regna rependens,
Extorres patria revehit pietate paterna.
135.0811A| Et quantum datur, Ecclesiam splendoribus ornat,
Vasa crucesque colens, sacra peripetasmata condens.
135.0812A| Nec longum terris exsul coelestia flagrans
Linguitur; at raptus tenebris, adjungitur astris.