135.0849|
135.0849B| Quam sancte atque pie Benedicti dogmate patris
Lustrati fratres Speciosus menteque nexus
Gregorius gazas coeli in secreta tulere
Illius egressus, hujus speculatio monstrat.
Ut patiens Christi sub verbere longanimis Spes
Constiterit, caecus facie sed corde renidens,
Exteriore carens haud interiore nitela,
Redditus expromit post longa volumina visus.
Annorum denis tandem quater orbibus actis
135.0850B| Notificatur huic, Domino retegente, laboris
Terminus, et claustris mandatur, lumine sumpto
Corporis, attiguis lumen respergere cordis,
Obsequio expleto remeans statione revisa,
Sacra petit mediusque accitis fratribus astans,
Cantica diva sonat cantusque exordia pangens,
Intentus precibus cum votis sidera scandit,
Atque columbino visus petere astra volatu
Proditur hac meta quam simplex acta palaestra.