135.0601|
135.0601C| Clarus in officio renitebat honore tyranni
Torpes, quem docuit divina Antonius heros,
Fonte sacrans divo, qui dogmate presbyter oris
Doctus apostolici, Christum memorabat aperte.
135.0601D| At Nero, percipiens Torpetem sacra subisse,
Addicit lanio cogendum ad fana profano;
Cumque fide fixus cogi ad scelerata nequiret,
Praecipit hunc, alapa crepitante satellitis ictum,
Morte furens vinciri altae vastaeque columnae,
Verberisque agitat crebris; dum corpore guttis
Elicitur sanguis, terram pluvia horrida tingit;
Expavit crudele nefas, subitoque columna
Censorem saevos pariter delapsa sodales
135.0602C| Quadraginta premit; patris post filius ulter
Victori insigni tormenta rotantia ponit,
Moliturque necem, belvisque ferocibus offert:
Mitescit sine more furor, servatur honore
Divino, trepidantque ferae contingere dente
135.0602D| Quem lacerarat homo crudelior ore ferino.
Hujus virtutem inspiciens Evellius unus
Consiliis dura fautorum lege Neronis,
Corde fidem Christi capit, ac baptismate lotus,
Lucis honore coronatur non tempore longo,
Post Romae coelum pretio cervicis adeptus.
At sanctum Domini Torpetem Silvius urbem
Extra Pisanam duci, patris impius haeres,
135.0603A| Delegat, diroque jubet mucrone feriri:
Exsultat martyr jugulo sumpsisse coronam.
Sanctum lictor atrox corpus scelerisque ministri
Naviculae injiciunt, carie atque teredine tritae,
Cum cane parricidali cumque alite dantes
Mergendum rapidi vitreas sub fluminis undas.
Matronae fidei venerandae mittitur aulae
135.0604A| Incola mox superae, Celeninae praecipit atque
Martyris inquirat pia membra, levetque locetque.
Quod celeri accelerare studet Celerina sequela,
Sarcofago dedens corpus venerabile mundo,
Basilicamque super cultu componit amoeno.
Felix Nuceriae simul ac Constantia passi
Tunc, nec non variis quam multi partibus orbis.