135.0647|
135.0647D| Vexatione vicit hac Felicitas
Dilecta Christo consecrando pignora.
Uberrimam post laeta dans poma arborem.
Praefectus hanc conatus arte vertere,
Mulcet serenis, ac minatur aspera.
Serena, saeva, blanda ducens tristia,
Huic reddit illa: « Nec resolvi mitibus,
Nec quibo frangi saevientis asperis,
Nec me supernus occupari Spiritus
Sinet aucupantis proditoris retibus;
Secura quare sum superstes vincere,
Etsi trucider, te triumphabo integre. »
Praefectus, inde bella matri comparans,
Die resedit Martis in foro altera,
Hancque exhiberi prole septena jubet
Stipatam, et indulgere natis admonet.
135.0648D| Ad quem beata his utitur Felicitas:
« Crudelitas tua, lenis exhortatio,
Pietatis hujus impia est miseratio. »
Hinc versa charos convenit sic filios;
« Videte, nati, coelum, et intuemini,
Hic Christus almo sustinet vos cum choro;
Pugnate vestri pro salute mentium;
Ejus fideles vos amori pandite. »
Alapis ad ista hanc concuti dat Publius,
Et convocans litare suadet liberis.
« Hortaris, infit, stulta Januarius;
Conservat autem summa me sapientia,
Dabitque cuncta vestra vinci tormina. »
Vibice plexum hunc censor abdit carcere.
Felix secutus: « Unus est quem novimus,
Cui vota purae servitutis solvimus;
135.0649A| Ne crede nostri charitate dividi
Nos posse Christi; saeviant si verbera,
Nec nostra vinci nec potest verti fides. »
Philippus inde: « Quos vocatis vos deos
Nec sunt potentes, nec habentur numina;
Simulacra vana, spurca, sensu inania
Sunt; his subactos stat perire in saecula. »
Silvanus inquit: « Ista si probaveris
Tormenta nos timere transitoria,
Aeterna victos auferent cruciamina:
Nam scimus aequis splendeant quae praemia,
Quae sint iniquis constituta debita:
Idcirco leges terreas contemnimus,
Obtemperare coelicis contendimus. »
« Sum servus inde Christi Alexander Dei;
135.0649B| Hunc ore fassus corde firmo credulus;
Indesinenter oro, supplex percolo
Infirma quam tueris aetas corpore
Canae nitela permicat prudentiae. »
Vitalis exin: « Ille vivit qui Deum
Verum precatur, haud rogat qui daemonas. »
135.0650A| Tum Martialis: « Qui Deum verum abdicant
Urentur ignis flamma ineluctabilis. »
Haec prosecuti moribus pro strenuis,
Regis supremi judicisque saeculi
Amore fratres ac timore fervidi,
Censor lituris dicta legat principi;
Quos ille poenis interire dissoni
Per differentes dat direptos judices.
Post saeva quorum flagra Januarius,
Post carceralia vincla plumbo caeditur;
Felix peremptus cum Philippo fustibus;
Silvanus alto vergitur fastigio;
At Martialis atque Alexander pia,
Vitale juncto, colla secti demigrant
Vitae perennis subituri gloriam.
135.0650B| Post passiones tot quot edit pignora
Parens beata plectitur novissima,
Et prole coelis obviante praedita,
Regis superni permeat palatia
Sumptura certa praemiorum gaudia.