135.0791|
135.0791A| Hinc laeti surgunt Agathonis tempora patris,
Moesta quidem Phoebes pallore obituque Quiritum.
Laeta sed Ecclesiae pace abjectuque ferorum.
Dum reges patresque Petri consortia sedis
Exposcunt, hilarans legatis Roma sororem
Imbuit, et consanguineos sibi nectit alumnos,
Seductorem abjicit, primam pietate cathedram
Illustrat Petri, telisque expurgat apertam;
Imbre venenifero turgens quae nevit Arachne,
Abradit reprobos, apto colit ordine dignos.
Junior inde Leo Graio Latioque lepore
Cultus, et organicis assuetus voce choreis
Plebem ad celsa vocat, concessa ad lucra talenta
Spargit, largus inops, inopumque piissimus altor.
135.0792A| Sextae scita probat synodi, damnatque rebelles,
Subjectos refovet, sedis pia jura receptat,
Paulo templa dicat, donis et cultibus ornat,
Deliquium lunae sequitur decessio papae.
Instructus sacris Benedictus sacra secundus
Jura capit, divo sophiae qui fonte redundans,
Ore manuque dati munus cognominis implet,
Regminis et dignus larga bonitate renidet:
Mansuetus, patiens, pronae virtutis amator.
Templorum reparat lapsus, dependit amictus,
Multiplicat cultus, attollit munere census,
Caesareo florent pariter pater urbsque favore;
Signa polo rutilant Bebiique incendia flagrant;
Mactus honore sacer regni fastigia captat.