135.0791|
135.0791B| Stirpe Syra veniens, quintus Romana Joannes
Culmina sortitur, generalis foedere voti
Strenuus et doctus, moderata et mente serenus.
Quique vices sedis, Graecis, libaverat hujus,
Concilio patrum pietate jugaverat urbes,
Pace nitet patriae: priscis dum Punica regna
Redduntur Dominus, gentes sub pace residunt,
Firmantur sacrata patrum consulta priorum;
Sanctorum turmae solantur munere dite;
Scinditur exempto hoc coetus diversa petentum.
Nec parti pars obsequitur, nec bella facessunt,
Donec angelicum cleri decreta Cononem
Attollunt, optantque virum per cuncta probatum,
Relligionis opus perfecto corde secutum.
Ilicet in laudem istius cum plebe Quirites
135.0791C| Dum coeunt digne, scandit sublimia dignus,
Regia dona pius caput Augustique favorem,
Et licet aegrotus coelestia munia tractat.
Nec longum emerito requies collata labori,
Plebs iterum in duo dividitur, nec jungere dextras
Diversis potis est, donec, miserante superno
Numine, praeligitur sedatis Sergius armis,
Litigiis divisa tamen cui vota relictis,
Solus qui rigida, ac versuta mente renitens
Insidiis nocuit, furtim dispendia finxit,
Se miser evertit, quavis se fraude subegit
135.0792B| Clancula quem post auguria, et cantamina tollunt.
Praesul ab incepta studiis qui creverat altis
Cleri militia, gradibusque ad summa vocatus
Subierat, votisque piorum ad singula fusis
Pignora floruerat, virtute et culmine floret;
Nec cedit sceptris, nec jussa profana veretur.
Immotus perstans, abduci sede jubetur;
At Petri auxilio pollens, et amore Quiritum,
Servatur cathedrae, servatque satellitis hostis
Propitius vitam, probris qui pellitur urbe;
Rex etiam regno, pia plebs ita pace potitur.
Munera diva crucis secretis abdita thecis
Huic Domino retegente patent, venerantur honore,
Deinde pio sacrisque coluntur tempore fixo.
Hic pater insignes renovat conditque decoris
135.0792C| Egregii fabricas, sacrorum percolit aedes,
Cultus instituit, pretiosa monilia cudit;
Ossa patris monitus levat attollitque Leonis,
Apparat ornatus dignos, agit ordine ritus;
Multiplicatque preces, cumulatque et destinat hymnos.
Erratus Aquileiensis discrimina plebis
Corrigit; absolvit, sanat, disponit, adunat,
Pacificatque greges, unique reducit ovili,
Supremo fert pastori pastorque renidet
Conspicuus, doctisque urbes pastoribus ornat.