135.0831|
135.0831A| Joannes subit hinc, qui fulsit in ordine nonus,
Pellitur electus patria quo Sergius urbe,
Romulidumque gregum quidam traduntur abacti.
Conciliis tamen is ternis docuisse refertur
Dogma salutiferum, novitasque aboleta malorum,
Et firmata fides doctrinis tradita Patrum.
Tum sacra consurgunt Benedicti regmina quarti,
Pontificis magni, merito qui nomine tali
Enituit, cunctis ut dapsilis atque benignus.
Huic generis nec non pietatis splendor opimus
Ornat opus cunctum, meditatur jussa Tonantis.
Praetulit hic generale bonum lucro speciali.
Despectas viduas, inopes, vacuosque patronis,
Assidua ut natos proprios bonitate fovebat:
Mercatusque polum, indiguis sua cuncta refudit.
135.0831B| Post quem celsa subit Leo jura, notamine quintus.
Emigrat ante suum quam luna bis impleat orbem.
Christophorus mox sortitus moderamina sedis,
Dimidio ulteriusque parum dispensat in anno.
De Sergio et caeteris ad Leonem septimum.
Sergius inde redit, dudum qui lectus ad arcem
Culminis, exsilio tulerat rapiente repulsam:
Quo profugus latuit septem volventibus annis.
Hinc populi remeans precibus, sacratur honore
Pridem assignato, quo nomine tertius exit
Antistes: Petri eximia quo sede recepto
Praesule gaudet ovans annis septem amplius orbis.
Ipse favens cleri censura in culmine rapto
Falce ferit pervasores. Quo rebus adempto
Humanis in Anastasium sacra concinit aula,
135.0831C| Tertius hoc praesul renitet qui, nomine Romae,
Sedis apostolicae blando moderamine rector,
Sentiat ut Christum veniae sibi munere blandum.
Quando dein summam Petri subit ordine sedem,
Mensibus hanc coluit sex ut denisque diebus
Emeritus Patrum sequitur quoque fata priorum.
Surgit abhinc decimus scandens sacra jura Joannes.
Rexerat ille Ravennatem moderamine plebem.
Inde petitus ad hanc, Romanam percolit arcem
Bis septem qua praenituit paulo amplius annis.
Pontifici hic nostro legat segmenta Seulfo.
135.0831D| Munificisque sacram decorans ornatibus aulam,
135.0832A| Pace nitet dum patricia deceptus iniqua,
Carcere conjicitur, claustrisque arctatur opacis
Spiritus at saevis retineri non valet antris:
Emicat immo aethra decreta sedilia scandens.
Pro quo celsa Petri sextus Leo regmina sumens,
Mensibus haec septem servat, quinisque diebus:
Praedecessorumque petit consortia vatum.
Septimus hinc Stephanus binos praefulget in annos.
Aucto mense super, bisseno ac sole jugato.
Disposita post quod spatium sibi sede locatur.
Nato patriciae hinc cedunt pia jura Joanni;
Undecimus Petri hoc qui nomine sede levatur.
Vi vacuus, splendore carens, modo sacra ministrans.
Fratre a Patricio juris moderamine rapto,
135.0832B| Qui matrem incestam rerum fastigia moecho
Tradere conantem decimum sub claustra Joannem
Quae dederat, claustri vigili et custode subegit.
Artoldus noster sub quo sacra pallia sumit,
Papaque obit, nomen geminum fere nactus in annum.
Septimus exsurgit Leo, nec tamen ista volutans,
Nec curans, apicis mundi, nec celsa requirens:
Sola Dei quae sunt alacri sub pectore volvens,
Culminaque evitans, oblata subire renutans.
Raptus at erigitur, dignusque nitore probatur.
Regminis eximii, Petrique in sede locatur.
Sed minime assuetam linquit decoramine curam.
Deditus assiduis precibus, speculamine celsus.
Affatu laetus, sapiens, atque ore serenus.
135.0832C| Qui me visentem aetherei pia limina Petri
Jocunde excipiens, animo quaesita benigno
Admisit, favitque pie, studuitque modeste:
Famina grata serens, epulis recreavit utrisque,
Corporis atque animae; benedixit, et oscula libans
Ac geminans dono cumulatum muneris almi,
Pergere laetantem amplexu dimisit honore.
Quem Pater omnipotens alacrem cultuque venustum
Attollat, servetque diu, digno excolat actu.
Et cum praesulibus sanctis, consortia quorum
Promeruit, sedis praestet super aethera sedem:
Cum quibus aeternum maneat praeclarus in aevum.
135.0832D| ( Huc usque Mabillonius. )