Ludit cum multis Vatanans sed ludere nescit,
Et putat imperio currere puncta suo.
Sed male dum numeros contraria tessera mittit,
Clamat et irato pallidus ore fremit.
Tum verbis manibusque furens miserandus anhelat,5
De solitis faciens proelia vera iocis.
Effundit tabulam, mensam, subsellia, pyrgum,
Perditaque Harpyacis aera rapit manibus.
Hic si forte unam tabulam non arte sed errans
Vicerit aut aliam, nil bene dante manu,10
Mox inflat venas et pallida guttura tendit
Plusque furit vincens quam superatus erat.
Non iam huic ludum sapientum calculus aptet,
[Qui possit potius ludere cum furiis.]