Pignora cara, dee, quas ante creata creavi
Secula, de partu glorior ipsa meo.
Summa voluntatis hec est: venistis ad istas
Consilii partes propositique mei.
5In rebus formisque suis si defuit orbi,
Suppleat id nostro numine vestra manus.
Plena minus, perfecta minus, minus esse decora
Que feci tociens, est michi turpe "minus"!
Sensilis hic mundus, mundi melioris ymago,
10 Vt plenus plenis partibus esse queat,
Effigies cognata deis et sancta meorum
Et felix operum clausula fiet homo,
Qualis ab eterno sub mundo principe vivit,
Digna nec inferior mentis ydea mee.
15Mentem de celo, corpus trahet ex elementis,
Vt terras habitet corpore, mente polum.
Mens, corpus — diversa licet — iungentur ad unum,
Vt sacra conplacitum nexio reddat opus.
Divus erit, terrenus erit, curabit utrumque -
20 Consiliis mundum, religione deos.
Naturis poterit sic respondere duabus,
Et sic principiis congruus esse suis.
Vt divina colat, pariter terrena capessat,
Et gemine causam sedulitatis agat,
25Cum superis commune bonum rationis habebit:
Distrahet a superis linea parva hominem.
Bruta patenter habent tardos animalia sensus,
Cernua deiectis vultibus ora ferunt.
Sed, maiestatem mentis testante figura,
30 Tollet homo sanctum solus ad astra capud,
Vt celi leges indeflexosque meatus
Exemplar vite possit habere sue.
Dii superi stelleque sibi celumque loquetur,
Consilium Lachesi notificante suum.
35Viderit in lucem mersas caligine causas,
Vt Natura nichil occuluisse queat -
Aerios tractus, tenebrosa silencia Ditis,
Alta poli, terre lata, profunda maris.
Viderit unde vices rerum, cur estuat estas,
40 Siccitat autumnus, ver tepet, alget hyemps.
Viderit unde suum Phebo iubar, unde sorori,
Vnde tremit tellus, unde marina tument,
Cur longis estiva dies extenditur horis,
Parvaque contrahitur nox breviore mora.
45Vt sua sint elementa volo: sibi ferveat ignis,
Sol niteat, tellus germinet, unda fluat.
Terra sibi fruges, pisces sibi nutriat unda,
Et sibi mons pecudes et sibi silva feras.
Omnia subiiciat, terras regat, imperet orbi:
50 Primatem rebus pontificemque dedi.
Set cum nutarit, numeris in fine solutis,
Machina corporee collabefacta domus,
Ethera scandet homo, iam non incognitus hospes
Preveniens stelle signa locumque sue.