Carmina (Baldericus) — 107. Ad eum qui sibi inimicabatur

Quandoquidem nequeo, quod me grauat, unicus esse -
Immo nemo potest unicus esse tibi -,
Sim saltem decimus uel quilibet inter amicos,
Sim cui digneris: "huc ades!" annuere.
5Quem tu pluris habes, habeamus pluris et ipsi:
Talpa tibi pluris, pluris et ipse michi.
Vt tibi gratificet, me Talpae gratificabor,
Quippe tuo Talpae nulla negare potes.
Nulla negare potes cui iam tua cuncta dedisti.
10 Talpa satis faciet te michi propicium.