1. Ver prodiens in virore,
Gramen humi suo more
Vult elici multiplici colore.
Flosculos tenellulos
Dat humor cum calore,
Nascitur et pascitur
Flos novus novo rore
2. Fronde frutex palliatur,
Flore viror decoratur,
In silvula iam merula letatur,
Frondibus et floribus
Dum Cypris adiocatur,
Superos et inferos
Amore stipulatur.
3. Forma nitens † polina
Predam rapit peregrina,
Interiit nec rediit regina.
Tumuit et puduit
In fonte Nonacrina,
Voluit nec potuit
Non esse concubina.
4. Iam Veneris a caterva
Sic revocat me Minerva:
"Non ocium, sed studium observa.
Omnibus amantibus
Sors accidit proterva,
Artibus, non viribus
Cupidinem enerva."
5. Hac igitur ratione
Cessat Amor, flet Dyone
De perdito tam subito tyrone.
Studeat et maneat
Scolaris in agone,
Gaudeat et floreat
Spe viridis corone!