1. Dulcis aure temperies,
Dulcis garritus avium,
His sunt cybus et requies,
Quibus amor est gaudium.
2. Amor est illa species
Iuxta vatis presagium,
Que repetita decies
Placet nec infert tedium.
3. Pallor, singultus, macies,
Suspiria, ieiunium,
Hec est Amoris acies
In castris militantium.
4. Amoris est materies
De natura celestium,
Quam non frangit canicies
Nec demolitur senium.
5. Amor, tua mollicies
Declinat in contrarium,
Tua blanditur rabies,
Tuum mel fit absintium.
6. Tu saturis esuries,
Siti peruris ebrium,
Per abrupta planities,
Per plana precipitium.
7. Amor, tua duricies
Vertitur in remedium,
Ludus tuus est series,
Tuus labor est ocium.
8. Si fiam Maro milies
Et linguis loquar omnium,
Vix explicem materies
Amoris et amantium.
9. Amor Medeam docuit
Spargi natorum sanguine,
Adriagnem destituit
Feris in ponti margine.
10. Amor Tonantem minuit
Indutum menbra femine,
Amor Alcidem domuit
Trahentem pensa domine.