1. Ecce torpet probitas,
Virtus sepelitur,
Fit iam parca largitas,
Parcitas largitur,
Verum dicit falsitas,
Veritas mentitur.
Omnes iura ledunt
Et ad res illicitas
Licite recedunt.
2. Regnat avaritia,
Regnant et avari,
Mente quivis anxia
Nititur ditari,
Cum sit summa gloria
Censu gloriari.
Omnes iura ledunt
Et ad prava quelibet
Impie recedunt.
3. Multum habet oneris
Do das dedi dare,
Verbum hoc pre ceteris
Norunt ignorare
Divites, quos poteris
Mari comparare.
Omnes iura ledunt
Et in rerum numeris
Numeros excedunt.
4. Cunctis est equaliter
Insita cupido,
Perit fides turpiter,
Nullus fidus fido,
Nec Iunoni Iupiter
Nec Enee Dido.
Omnes iura ledunt
Et ad mala devia
Licite recedunt.
5. Si recte discernere
Velim, non est vita,
Quod sic vivit temere
Gens hec imperita,
Quia non est vivere,
Si quis vivit ita.
Omnes iura ledunt
Et fidem in opere
Quolibet excedunt.