1. Dum queritur michi remedium,
Quo pellitur opus Venerium,
Distrahitur mens in contrarium
Nec vertitur amor in odium.
Dum fugitur
Amor, incurritur,
Et non convertitur in mel absinthium.
Nil agitur,
Si, dum relinquitur
Syrtis, incurritur Sille naufragium.
2. Iam comperi, passus tot aspera,
Cor conteri Veneris opera;
Aligeri post dei verbera
Non reperi Cypridis ubera.
Hic Veneri
Mos est a veteri,
Quod reddit operi secundum opera,
Me lateri
Patitur inseri,
Si manum miseri muniunt munera.
3. Si pretio preditus veniam,
Invenio Veneris veniam;
Imperio si non obediam,
Non venio gratis ad gratiam.
Ambitio
Subest huic vitio:
Diligi nescio, dare si nesciam;
Iam sentio,
Nisi desipio:
Venus in precio sequitur curiam.
4. Dum offero Niobe staterem,
Ius affero, fores ut reserem.
Si venero venerans Venerem
Nec dedero, tulero carcerem.
Nil egero,
Si preces fudero,
Tantum profecero verberans aerem.
De cetero
Non utar utero,
Quia non lavero luteum laterem.
5. Ad cumulum tanti discriminis
Iam loculum hausit lex inguinis;
Periculum turbidi turbinis
Ridiculum me fecit hominis.
Post paululum
Cogar ad vinculum,
Nisi dem poculum gule voraginis;
Iam nodulum
Et burse modulum
Abstulit patulum guttur voraginis.