1. Autumnali frigore
Marcescente lilio
Foris algens corpore
Flammas intus sentio;
Stultus ex industria
Logicis obicio,
Quod duo contraria
Suscipio.
2. Iovis intemperies
Mutat rerum speciem,
Nulla meam species
Alterat temperiem,
Totum cogat spiritum
Boreas in glaciem,
Tamen hoc propositum
Non variem.
3. Viole, vaccinia
Carent rore vitreo,
Cadunt, marcent lilia,
Sto semper et floreo.
Dum sola sit stabilis
Niobe, quam teneo,
Solus immutabilis
Permaneo.
4. Dum contemplor oculos
Instar duum syderum
Et labelli flosculos
Dignos ore superum,
Transcendisse videor
Gazas regum veterum,
Dum semel commisceor
Et iterum.
5. Amoris ex debito
Me iugo subiciam,
Licet quis, et merito,
Reputet infamiam.
Moris est sic vivere.
Licet ergo serviam,
Visus michi sapere
Desipiam.