1. Adest dies annua Nicholai presulis,
Per quem vite ianua suis patet servulis,
Qui sustentans opibus domum castitatis
Succurrit virginibus stupro deputatis.
2. Ab adolescentia vi divina preditus
Iura puerilia transcendit divinitus.
Voluit iustitia <digne> sublimari,
Quem vox Christi nuntia iussit infulari
3. Audito per nuntium Nicholaus scelere,
Quod tres ad supplicium tenerentur carcere,
Currit ad pretorium, solvit conpeditos,
Mutat in consilium mores infrunitos.
4. Iesu, quem puerpera lucem fudit seculo,
Tu, qui hec et cetera contulisti famulo,
Nos ab hoste libera scuto tue precis
Et transfer ad sydera nos de luto fecis.
Amen.