Ultima terrarum praepollens India constat,
Quam in tres partes librorum scripta sequestrant,
Idola quae coluit paganis dedita sacris.
Sed Bartholomeus destruxit lurida fana,
Effigies veterum confringens jure deorum,
Hebrea quem clamat peregrinis lingua loquelis.
Proles suspendentis aquas in nubibus atris,
Humida nimbosis dum stillant aethera guttis,
Quot [quem] signat procerum coelestis dona profundi
Ut quondam cecinit Psalmorum carmine vates:
(0768B)Ecce latex rorat tenebrosis nubibus aeris.
Post haec martyrii mercatur serta cruenta
Et sequitur Dominum pictus cum [ Al., in] stigmate Christi
Cujus hoc templum veneranda tuebitur ara.