Obtulit altithrono parvus munuscula servus
Richbodo, quae cernis, lector, in aede sacra,
Ob scelerum veniam, ob vitae coelestis amorem;
Pro quo quisque legas, funde preces Domino:
Pro te, proque tuis quas fundes, frater amate,
(0788B)Ad haec, dum venias, limina sacra domus,
Christus ab aetherea clemens exaudiat arce,
Te faciens, lector, corde redire domum.
Te rogo, sancte Pater, supplex per carmina nostra
Sis memor et nostri, te, rogo, sancte Pater -
Dulcis Homere, precor, Flacci memor esto poetae,
Sis memor ut Samuel, dulcis Homere, precor.
Auxiliare senem nostros, rogo, tu per amicos,
Est locus insenos auxiliare senem
Est mihi certa fides de te, charissime frater,
Cum Christo et sanctis sit tibi certa salus.
Pro mundo moriens hic mundi vita pependit,
Abluit omne hujus sanguinis unda nefas:
Dum caput inclines mundum super erigit astra,
Et mirum saeclis, mors tua vita fuit.
(0788C)Agnus ab hoste sacer, populum qui per mare duxit,
Nunc melius mundum salvat ab hoste suum.
Aeneus en serpens, populi qui vulnera sanat,
Nunc tu peccator aspice mente pia.